Fa’atomuaga
O le aso 17 Iuni 2017, sa pasia ai e le Palemene a Samoa le Tulafono o Suiga o Lafoga o Tupe Maua (Legislative Assembly of Samoa , 2017). O lea suiga i le tulafono ua faaopoopo i ai le totogiina o lafoga a faifeau tausinuu. O lea lafoga e fua i luga o alofa a faifeau, faatasi ai ma soo se alagatupe e maua i le faatinoina o lana galuega. Mulimuli ane sa toe faase’e ese le vaega lona lua lea, ae ua agai sa’o le tulafono i alofa a faifeau (Palemene Lona XVI, Tauaofiaga Lona Tolu, 2018: 358-374).
Talu ona tutoatasi o Samoa i le 1962, e le’i aofia faifeau tausinuu i le totogiina o lafoga. E pei o le saunoaga a le Alii Palemia i se faatalanoaga i le 2018, “Ua 56 tausaga talu ona Tutoatasi, ua 56 foi o tausaga o malolo pea tatou Faafeagaiga mai le totogiina o lafoga.” (Legislative Assembly of Samoa , 2018) I le ma lea “o le lafoga o le sao lea a faifeau” i le atina’eina o le atunuu (Feagaimaalii-Luamanu, 2017).
E lē o toe po malaē i le tete’e a le Ekalesia Faapotopotoga Kerisiano Samoa (EFKS) i lea tulafono. O lea tete’e sa pasia i le Fonotele i Malua ia Me 2017. E ui i se tu’ualalo a tamā o le Ekalesia i le Malo ina ia toe lauliliu o lenei mataupu, ae na faatinoina lava ma faamalosia i le masina o Ianuari 2018. O le faamamaluina o le tulafono na amata ai loa ona molia o faifeau tausinuu a le EFKS, ma amata valaau ai loa e tutulai i luma o le faamasinoga.
