‘Oto’otoga
O le tāofisā o tagata Sāmoa e fa’asoa lo lātou iloa i le aganu’u ma agaifanua, aemaise i le saofa’iga a matai, ua avea nei o se fa’afītāuli i fanau ā’oga. A o atu fanau e fa’atino a lātou su’esu’ega i o lātou Fa’asinomaga ae tāofiofi mamau ma mumusu ni isi matai e fa’asoa lo lātou silafia i fanau ā’oga. O le manatu o le tusitala, afai ae tāofiofi pea le mau, talofa e i nai fanau, a nei ta iai le ēfu o le fau. O lenei tūsiga o le taumafaiga a le tusitala e fa’amatala se vāega o le talafa’asolopito o lona nu’u o Sāmusu, o se tasi o tafa o lona fa’asinomaga. O le sao lea o le tusitala i alo ma fanau e le gata o lona nu’u, itūmālō ae fa’apea ma i lātou o lo’o ao’oga i le Iunivesitē aoao o Sāmoa ma atunu’u i fafo. O se vāega o lana su’esu’ega mo lona fa’ailoga o le Fōma’i o le Tōfāmanino (PhD) i aganu’u a Sāmoa i le Iunivesitē Aoao o Sāmoa.
