’Oto’otoga
E ’ānoa ma tāua tiute o se taitai i pulega ma le mataituina o faatinoga ma atinae i totonu o alalafaga (Iati, 2000). Na amata ona faauluulu pulega ma faamasinoga faalenuu i alii ma faipule (matai) i le 19 seneturi ona o latou sa nafa ma le tausisia o le saogalemu lautele ma le nofo filemu o nuu, ao lei iai se faigamalo tutotonu aloaia (Davidson, 1970). O pulega nuu e aofia ai alii ma tulafale ua faasuafaina e aiga potopoto ma ua resitala i le Faamasinoga o Fanua ma Suafa (Keesing & Keesing, 1956). O le faalapotopotoga lenei e faia tulafono, faaiuga ma faasalaga i nuu, ma e mafuli i le itupa o alii.
Olo’o faamauina i le talaaga o Samoa le avea o tamaitai ma taitai i seneturi ua mavae, ao lei oo mai Misionare, ma pulega mai fafo sa faafoeina le atunuu (Gunson, 1987). O nisi o lagisoifua o nei taulagiga, e aofia ai le taitaiga a le atua o taua o Nafanua, faapea foi ma Salamasina, o le uluai Tafaifa na pulea Samoa i le silia ma le 40 tausaga (Meleisea, 1987). O tina ma tamaitai isi tagata na galulue malosi ina ia mautinoa e maua le tutoatasi o le malo o Samoa. Sa faatu le latou mau i le 1930 e tetee atu i le pulega a le malo o Niu Sila, e ui ina o le vaitau tonu lea o le vevela o fevesiaiga (MacQuoid, 1995). Na auina atu e le Mau a Tina ma Tamaitai se tusi i Malo Aufaatasi e lagolago ai le mataupu a le Mau a Alii ma Faipule, ina ia faamatuu mai se Malo Tutoatasi mo Samoa. Na faamanuiaina le talosaga lenei ina ua tutoatasi Samoa ia Ianuari aso 1, 1962.
