Faamatalaga
O lenei tusitusiga e faamatalaina ai le faaumatia o le alii logologoā o Tamafaiga mai le nuu o Manono, ma e faamatalaina ia mau mai faamaumauga a suli ma le aiga o Aiono Faapologaina i Matavai i Fasitoo-uta. O nei foi faamatalaga ua lagolagoina e Tupua Tamasese Efi i le tusi o le ‘Su’esu’e Manogi,’ e faavae i faamaumauga ma faamatalaga lautele ma tala tuu-faasolo ma mau a lenei aiga, e aofia ai foi mai isi tusitusiga ua mafai ona faamauina. E faaopoopo i ia faamaumauga, ua i ai foi ni isi o faaiuga a le Faamasinoga o Fanua ma Suafa e lagolagoina ai lenei tusitusiga. O lenei foi tusitusiga e faataua ai le sao o le tala faasolopito o le taunuu mai i Samoa o tala’iga a le lotu Uesiliana i le 1828 ma le Lonetona Misionare Sosaiete i le 1830 lea na mua’i ta’ua o le lotu Toga mulimuli ane ua ta’ua o le Ekalesia Metotisi ma le lotu Ta’iti lea ua igoa nei o le Ekalesia Faapotopotoga Kerisiano i Samoa.
Upu ia matauina: fasioti, taupulepulega, fasiotia, Tamafaiga
